सिग्नल शाळा, नाकाशाळा, महानिर्माल्य अभियान, प्रकल्प पुनर्निर्माण या अशा कल्पना की ज्यांनी जग बदलायचे स्वप्न पहिले. मूलभूत चैतन्याशी तादात्म्य झाल्याने समर्थ भारत व्यासपीठाच्या चमुला सुचलेल्या या कल्पना आहेत.

रस्त्यावरील भिक्षेकरी मुलांना शिक्षणाच्या मूळ प्रवाहात आणणे हिच केवळ सिग्नल शाळेची उपलब्धी नसून “सर्वेन सुखिनः संतू सर्वे संतू निरामया” या मूलभूत विचाराचा तो अविष्कार आहे. लोकांच्या घराचे स्वप्न साकारणारे स्वतः मात्र बेघर विस्थापित जगणारे अशा अकुशल बांधकाम मजुरांना कौशल्याधारित करण्याची अभिनव कल्पना नाकाशाळा अर्थात प्रकल्प निर्माणामागे आहे. अवघे विश्व हे पृथ्वी, आप, तेज, जल, वायू आणि आकाश या पंचमहाभूतांनी साकारलेले असताना त्या साखळीचा भेद करत निर्माल्याची अशास्त्रीय विल्हेवाट थांबवून निर्माल्याचे खतरूपी मातीत रूपांतर करण्याची कल्पना महानिर्माल्य अभियानातून साकारली गेली.

गेली बारा वर्षे समर्थ भारत व्यासपीठ हि संस्था भारतातील मुंबई नजिक असलेल्या ठाणे शहरात काम करीत आहे. सिग्नल शाळेच्या माध्यमातून भीक्षेकरी मुलांना शिक्षणाच्या मूळ प्रवाहात आणण्याचा पॅटर्न संस्थेने उभा केला, अकुशल नाका कामगारांना कौशल्याधारित करण्यासाठीचा नाका शाळा संस्थेने सुरू केला, ठाणे शहरातील वार्षिक ३ हजार टन हरित कचऱ्यावर प्रक्रिया करून कोळसा तयार केला जात आहे, वर्षाकाठी २ हजार टन निर्माल्यावर प्रक्रिया आज केली जात आहे. आपल्या ५० बचतगटांच्या माध्यमातून ५०० आर्थिकदृष्ट्या दुर्बल महिलांच्या जीवनात आर्थिक स्वातंत्र्य आणण्याचे काम संस्था करीत आहे.