ठाण्यातील समर्थ भारत व्यासपीठ यांनी महिला कचरावेचक, कचऱ्याचे वर्गीकरण करून उदरनिर्वाहासाठी कठोर परिश्रम करणाऱ्या व्यक्तींच्या पुनर्वसनाचा अभिनव उपक्रम कार्यान्वित केला आहे. यापैकी अनेक महिलांना त्यांच्या दैनंदिन जीवनात आर्थिक असुरक्षितता, आरोग्य समस्या आणि सामाजिक कलंक यासह महत्त्वपूर्ण आव्हानांचा सामना करावा लागतो. 

कचरावेचक व सफाईसेवक केवळ चतुर्थश्रेणी कामगार राहिले आहेत. यापलिकडे त्यांच्या जगण्याच्या व्याख्येत काहीही बदल झाला नाही. सगळे पुर्नप्रक्रिया करणारे उदयोजक व तथाकथीत भंगारवाले करोडपती झाले पण सफाईकामगार व कचरावेचकांचे पुनर्निर्माण ख-या अर्थाने झालेच नाही.

समर्थ भारत व्यासपीठ संचालित वस्ती विकास प्रकल्पाअंतर्गत वागळे वसाहतीत डोंगर उतारावर अत्यंत दाटीवाटीने एकमेकावर छोटी छोटी घरे असलेल्या, अरुंद सेवा वस्त्यां मध्ये, जिथे आरोग्याच्या मूलभूत सुविधांची कमतरता आहे, मुलांना शाळेत न पाठविता पोटासाठी कामावर पाठविले जाते, दिवसभर मुले घाणीत अर्वाच्य भाषेत बोलत खेळत असतात, व्यसनांचा सर्रास उपलब्धता आहे अश्या वस्त्यांमध्ये मुलांवर अभ्यासिका, संस्कार वर्ग, किशोर वयीन विकास वर्ग, युवा विकास वर्ग, आरोग्य सेवा द्वारा चांगले संस्कार, सुदृढ आरोग्य, अभ्यासाचे वातावरण उपलब्ध करून भारताचे चांगले नागरिक करण्याचा प्रयत्न केला जातो. सध्या चाळीस सेवा वस्त्यांमध्ये सेवा प्रकल्प असून एकूण ८२० विद्यार्थी लाभ घेत आहेत.

सामाजिक-आर्थिक असमानतेला आव्हान देऊन त्यावर मात करणे, समाजातील असुरक्षित घटकांना स्वावलंबनाच्या ध्येयाकडे घेऊन जाणे व सक्षम करणे. प्रत्येक विद्यार्थ्याला वेगाने बदलणाऱ्या जगात यशस्वी होण्यासाठी अनूकुल वातावरण निर्माण करणे. निरक्षरता, अज्ञान व व्यसनाधीनता यांच्याशी लढा देण्यासाठी आणि गुन्हेगारी प्रवृत्तीला प्रतिबंध करुन विकासाचे अंतिम उद्दिष्ट साध्य करण्यासाठी विद्यार्थी, तरुण, युवती व महिलांचे संघटन निर्माण करुन लोकशक्ती एकत्रित करणे. भारतीय संस्कृती जतन करुन सर्व समाज एकरस व समरस होऊन भारतभुमीला पुन्हा परम वैभव प्राप्त व्हावे हा प्रामाणिक हेतू घेऊन संस्था कार्यरत आहे.