ठाण्यातील तीन हात नाका पुलाखाली सिग्नल शाळा हा अभिनव उपक्रम २०१६ साली समर्थ भारत व्‍यासपीठ व ठाणे महानगरपालिका यांच्‍या संयुक्‍त प्रयत्‍नाने सुरू झाला. जवळपास वीस ते बावीस वर्षांपासून सिग्नलवर पुलाखाली विस्तापित आयुष्य जगत असलेल्या स्‍थलांतरीत कुटूंबातील ७० हुन अधिक मुले शिक्षण व समाज या दोघांच्‍या मुख्‍य प्रवाहात आली. बेघर निर्वासित मुलांच्‍या गरजांनुसार त्‍यांना स्‍कुल बस, आंघोळ, तीन वेळेचे जेवण ते थेट संगणक, रोबेटिक, तंत्रशिक्षण, क्रीडा प्रशिक्षण देणारी व मुलांच्‍या गरजेनुसार लवचिक असलेली शाळा पहिल्‍यांदाच ठाणे येथे उभी राहिली. समर्थ भारत व्यासपीठ ही संस्था भारतातील महाराष्ट्र राज्यात सक्रिय असून मुंबई, ठाणे आणि पुणे या जिल्ह्यांत सामाजिक कार्य करत आहे.